A historia musical de Sanxenxo é relativamente antiga. No s. XIX créase en Padriñán unha pequena agrupación, a partir da cal Víctor Guiance funda en 1927 unha banda de música que se manterá ata 1941.

A tradición bandística no concello permanecerá nun impás ata que no ano 2000 se oferte desde a Concellería de Cultura a actividade de música, cunha resposta moi positiva por parte da comunidade que permitirá que ao ano seguinte a Escola de Música conte con 18 especialidades e máis de 100 alumnos. Todo isto, xunto co esforzo de alumn@s, nais e pais, profesores da escola e responsables políticos, fará posible que o 26 de maio de 2002 se presente unha nova agrupación musical baixo a dirección de Rafael Torres Míguez, a actual Banda de Música de Sanxenxo.

Coma todas as asociacións, a banda experimentou períodos de auxe e de declive, sobre todo nos períodos de cambio de director pois afecta tanto a nivel musical coma a nivel colectivo.

Co noso primeiro director conseguimos acadar o 2° posto no IV Certame Internacional de Vila de Sénia (2010), quedando a tan só un punto dos gañadores; e o 2° premio no X Certame Provincial de Bandas da Deputación de Pontevedra 2010).

Desde 2012 ata comezos de 2015 a banda estivo dirixida por Pedro Villarroel González, co cal obtivemos un 3° posto no XVIII Certame Provincial de Bandas da Deputación de Pontevedra (2014).

En marzo de 2015 a dirección artística da banda pasará a mans de Javier Alonso Pérez, con quen se conseguiron un 3° e un 1° premio na segunda sección do X (2016) e XI (2017) Certames da Federación Galega de Bandas de Música Populares.

O relevo será tomado en novembro de 2018 e ata a actualidade por José Varela Pardo, co cal tras un primeiro ano de adaptación tiñamos diferentes proxectos que se viron truncados por mor da COVID-19.

En canto ao futuro, non descartamos presentarnos a algún certame cando a situación sanitaria se estabilice, así coma organizar algún encontro e/ou intercambio con algunha banda a nivel estatal. Por outro lado, non perdemos de vista a labor educativa da banda tanto a nivel persoal coma músical, especialmente nos seus membros máis noveis, quenes aprenden non só a traballar en grupo e a escoitar, senón tamén valores de responsabilidade e pertenza a un colectivo.