En Vilanova de Arousa, o Entroido non remata ata que o Momo desaparece entre as lapas. Esta celebración, coñecida como O Enterro do Momo, converteuse co paso dos anos nunha das citas máis multitudinarias do Entroido nas Rías Baixas, reunindo cada ano a milleiros de persoas que se achegan a vivir unha xornada de sátira, humor e tradición.

O Momo é unha figura de orixe grega que simboliza o sarcasmo e a burla. Na Antigüidade representábase con máscaras ou bonecos, e esa imaxe foi perdurando ata hoxe. En Vilanova, a festa recuperouse hai unhas décadas grazas a un grupo de veciños que, con espírito festivo, decidiron traer de novo a esta figura á ría. O que comezou como unha xuntanza de amigos acabou institucionalizándose e tomando tal forza que o propio Concello fixo seu o evento, ata convertelo nun referente.

A diferenza doutras celebracións como o Enterro da Sardiña, en Vilanova cada ano escóllese un personaxe de actualidade para ser representado no Momo. Esta escolla mantense en segredo ata o desfile, momento no que se desvela a identidade do protagonista, que simboliza a crítica social e o humor que caracterizan esta festa. En anos anteriores, figuras coñecidas como Belén Esteban ou Monedero foron protagonistas desta queima.

O programa do Enterro do Momo inclúe a presenza de charangas, comparsas, carrozas e a tradicional carroza do Momo, acompañada pola Sardina Xigante e pola Raíña do Entroido. Polas rúas do municipio desfilan cores, música e sátira, creando un ambiente único que combina tradición e modernidade. O broche final chega coa queima do Momo, un ritual cargado de simbolismo que marca o adeus oficial ao Entroido.
A importancia desta festa para Vilanova é tal que, en 2010, o escultor e canteiro Enrique Velasco creou unha obra en homenaxe ao Momo. Trátase dunha escultura de 2,10 metros de altura, situada no paseo marítimo, preto da rampla onde cada ano o Momo desaparece no lume. A figura, barbuda e barriguda, simboliza os excesos do Entroido e está feita de pedra e silicio, un material que deforma a imaxe de quen se reflicte nel, recordando que calquera pode converterse no Momo.

En 2025, o Enterro do Momo celebróuse o domingo 9 de marzo, cunha xornada chea de música e humor. Desde a mañá, a charanga Turtilla du Ribés animará as rúas, e pola tarde terá lugar o gran desfile presentado por Xacobe, coa participación de artistas como Pepo Suevos. As carrozas, comparsas e charangas acompañarán ao Momo ata o seu final entre as lapas, nunha festa que mestura crítica, tradición e diversión.

O Enterro do Momo non é só unha celebración, é unha metáfora do Entroido vilanovés: unha festa que combina exceso, humor, identidade e comunidade, e que cada ano reafirma a Vilanova como capital do Entroido en Mar de Santiago.