O folclore infantil galego debeu ser riquísimo. Sen embargo, pouco a pouco foi esmorecendo. Primeiro nas vilas e cidades, onde comezaron a imperar as cancións e os xogos cantados en castelán. Así, os xogos cantados en galego quedaron relegados ás aldeas.

De todas as maneiras, estas cancións infantís apenas interesaron aos folcloristas, antropólogos e etnógrafos que investigaron o noso patrimonio, por consideralas «material de terceira categoría». Mesmo falando, hai uns dez anos, en Santiago, cunha das «vacas sagradas» da etnografía en Galicia, Carmelo Lisón Tolosana, comentárame: «Si, tienes razón, en muchas ocasiones nos olvidamos del folclore infantil o solamente le dedicamos un pequeño apartado en nuestros trabajos».

Pola contra, desde hai máis de dúas décadas atopámonos con asociacións como BRINQUEDIA, que se dedican á recuperación e ao fomento dos xogos populares galegos. Hai uns anos, falando co seu presidente, Xosé Manuel Barreiro Ínsua, comentábame: «Carlos, o traballo dos nenos é xogar».

E diso imos tratar hoxe: dun xogo de nenos e nenas que era moi popular en toda a contorna da embocadura da ría de Arousa, desde a Illa, pasando polo Grove e, por suposto, por Sanxenxo, onde o escoitamos por primeira vez.

Varios nenos e nenas sentan no chan ou arredor dunha mesa. Cada rapaz ten nas mans dúas pedriñas, unhas cunchas de berberecho ou calquera outro obxecto semellante. Comeza a canción e os nenos van pasando ao compañeiro da dereita as pedras, mentres reciben as dúas pedras que lles pasa o compañeiro da esquerda. A medida que o xogo transcorre, a canción vaise acelerando ata que alguén se equivoca e perde. Quen perde ten que pagar unha prenda imposta polos seus compañeiros, como subir a unha árbore, meter herbas na boca ou coller ortigas coas mans.

É certo que a cantiga vai en castelán, pero cómpre ter en conta que este é un proceso histórico polo que atravesou a nosa lingua, nos guste ou non.

San Pedro, como era calvo,
le picaban los mosquitos
y su padre le decía:
ponte la gorra, Perico.

Pincha este enlace para ver una recreacion del juego en vídeo en nuestro canal de Youtube eSmásTV